सचिवसँग निर्माण व्यवसायीको आर्तनादः काम गरौँ पैसा छैन, नगरौँ कारबाहीको डर

काठमाडौँ । शुक्रबार मध्याह्न १२ बजे । नेपाल निर्माण व्यवसायी महासंघका अध्यक्ष निकोलस पाण्डेसहितको टोली पूर्वाधार विकास मन्त्रालय पुग्दा सचिव गोपाल सिग्देलको कार्यकक्ष रित्तो थियो । निर्माण व्यवसायीलाई छलफलका लागि १२ बजे समय दिएका सचिव सिग्देल प्रधानमन्त्री कार्यालयमा छलफलका लागि गएका थिए ।

व्यवसायीहरूले केही समय हलमा कुरे, पटक–पटक फोन गरे, तर उठेन । अन्त्यमा अध्यक्ष पाण्डेले म्यासेज पठाएपछि सचिवको जवाफ आयो– ‘म सहरी विकास मन्त्रालयमा आउँदै छु, त्यहीँ भेटौँ ।’

व्यग्र प्रतीक्षामा रहेका व्यवसायीको टोली हतार–हतार सहरी विकास मन्त्रालयको सभाहल पुग्यो । सानो संख्यामा पत्रकार पनि । केही समयको पर्खाइपछि हतासमा सचिव सिग्देल सभाहलमा आइपुगे । निर्माण व्यवसायी हर्षित देखिए ।

जब सचिव सिग्देल सभाहलमा प्रवेश गरे, उनी व्यवसायीका समस्या सुन्नुभन्दा पनि त्यहाँ उपस्थित क्यामेरा र पत्रकारहरूलाई देखेर झर्किए – ‘यो क्यामेरा यहाँबाट हटाउनुस् ।’ तर व्यवसायीहरूले आन्तरिक प्रयोजनका लागि खिच्छौँ भने । तर सचिव सिग्देलले मानेनन् ।

त्यसपछि व्यवसायीले हाम्रो मात्र खिच्नुस् भने केहि पत्रकारले अटेर गरेर सचिव सिग्देलतिर लेन्स तेर्साए ‘अनुमति नलिई खिच्न पाइन्न भन्ने थाहा हुँदा हुँदै किन खिचेको ?’ फेरि सचिव सिग्देल पत्रकारसँग कड्किए, ‘नखिच्नुस् भनेको सुन्नुहुन्न ?’

उनले पटक–पटक क्यामेरा बन्द गर्न निर्देश गरेपछि केहीबेर सुनसान छायो । यसपछि सचिव र व्यवसायीबिच संवाद सुरु भयो, त्यहाँ गुनासो मात्र थिएन, एउटा सिङ्गो उद्योग नै कोल्याप्स हुन लागेको आर्तनाद सुनिन्थ्यो ।

अध्यक्ष पाण्डेको प्रश्न – सबैलाई राहत, हामीलाई किन आहत ?

छलफलको सुरुमा महासंघका अध्यक्ष निकोलस पाण्डेले निर्माण क्षेत्रले भोगिरहेको चरम संकटको बेलिबिस्तार लगाए । स्ट्रेट अफ हर्मोजमा भएको अवरोधले पेट्रोलियम पदार्थको मूल्य आकासिएपछि निर्माण व्यवसायीहरू सबैभन्दा बढी मारमा परेको उनले सचिवलाई सुनाए ।