बालेन शाह : नयाँ सरकारले एक महिनामा के-के गर्यो?
देशको कार्यकारी पदमा पुगेको एक महिना पुग्दै गर्दा प्रधानमन्त्री बालेन्द्र शाह 'बालेन'ले काठमाण्डू महानगरको प्रमुख हुँदा 'गर्न नसकेको' भनिएको उपत्यकाको नदी किनारका सुकुम्बासी बस्ती हटाउने काम सुरु गरे।
शनिवार थापाथली र सिनामङ्गल क्षेत्रमा बसिरहेका भूमिहीनलाई हटाएर उनीहरू बस्दै आएका घरटहरामा डोजर चलाइयो। त्यो क्रम आइतवार पनि जारी रहने प्रधानमन्त्री कार्यालयले जनाएको छ।
दशकौँ देखि सङ्घीय र स्थानीय सरकारहरूले पूरा नगरेको सुकुम्बासी समस्या समाधानको बाचाका लागि बालेन सरकारले चालेको कदमले मिश्रित प्रतिक्रिया पाइरहेको छ।
काठमाण्डू महानगरपालिकाको मेअरबाट राजीनामा दिएर प्रधानमन्त्री बन्ने घोषणा सहित संसदीय चुनाव लडेका बालेन शाह संलग्न राष्ट्रिय स्वतन्त्र पार्टीले फाल्गुनमा भएको चुनावमा दुई तिहाइ नजिक मत ल्याएपछि एकल बहुमतको सरकार बनायो।
चैत्र १३ गते सरकारको नेतृत्व सम्हालेदेखि नै शाहले परम्परागत शासन शैलीमा फेरबदल ल्याएको नेपाल खुला विश्वविद्यालयमा शासकीय व्यवस्था अध्यापन गर्ने सहप्राध्यापक हरीप्रसाद ढुङ्गाना बताउँछन्।
"जुन तरिकाले सरकार सञ्चालन हुन्थ्यो, जुन ढाँचामा सरकारले काम गर्थ्यो त्यसमा केही फेरबदल गर्न खोजेको देखिन्छ। एउटा नयाँ आत्मविश्वाससहित आएको देखिन्छ," ढुङ्गाना भन्छन्।
"अर्को चाहिँ पहिलेका पार्टीहरूले गरेको कामप्रति जनताले महसुस गरेका ढिलासुस्तीमा देखिने गरी परिवर्तन गर्न खोजेको जस्तो देखिन्छ।"
