JSP Nepal leader Sarvendranath Shukla discusses the electoral defeat of Madhesi parties, attributing it to failure to embrace change and…

काठमाडौँ । रुपन्देही–४ बाट यसअघि पटक–पटक चुनाव जितेका जनता समाजवादी पार्टी (जसपा) नेपालका शीर्ष नेता सर्वेन्द्रनाथ शुक्ला फागुन २१ गतेको चुनावमा पराजित भए, ३ हजार ४१० मत ल्याएर चौथो स्थानमा थन्किए ।

उनले मात्र शर्मनाक हार भोगेनन्, मधेसवादी दलहरू नै जिरोमा पुगे । तराई–मधेसका अधिकांश नेताको हालत उनकै जस्तो छ ।

२०४८ देखि हरेक चुनावमा मधेसवादी दलका कुनै न कुनै नेताले चुनाव जित्थे, तर यसपटक सबै पराजित भए । यस्तो अवस्था आउनुको कारण के हो ? दोषी को हो ? कहाँ भयो त्रुटि ? यी र यस्तै विषयमा हामीले जसपा नेपालका नेता सर्वेन्द्रनाथ शुक्लासँग कुराकानी गरेका छौँ ।

हेर्नुहोस्, यो समाजले परिवर्तन खोजेको थियो । विचारमा परिवर्तन, नेतृत्वमा परिवर्तन र समग्रमा परिवर्तन खोजेको थियो । तर हामीले त्यो परिवर्तनलाई अँगाल्न सकेनौँ । हामी त्यो हिसाबले प्रस्तुत हुन सकेनौँ । हामीसँग नीति पनि पुरानै रह्यो, हामीसँग नेतृत्व पनि पुरानै रह्यो ।

त्यही कारण हामी कमजोर भयौँ । त्यसैले अब यसबाट हामीले पाठ सिकेर जेनजी आन्दोलनले जुन मेसेज दिएको थियो, त्यो कुरा बुझेर अगाडि बढ्नुपर्छ । जेनजी आन्दोलन जेनजीहरूका लागि मात्रै होइन, त्यो मेसेज सबैका लागि थियो । तर हामीले त्यो बुझ्न सकेनौँ । दोस्रो एउटा महत्त्वपूर्ण कारण के थियो भने राष्ट्रिय स्वतन्त्र पार्टीका तर्फबाट जुन प्रधानमन्त्रीका उम्मेदवार प्रस्तुत गरिएको थियो, त्यो एउटा मधेसी अनुहारलाई अगाडि सारिएको थियो ।

मधेस भावनामा नै सम्भावना खोज्छ, यो धेरै पुरानो कुरा हो र पुरानो बानी पनि हो । भावनामा बगेर उसले यसैमा प्रबल सम्भावनाहरू खोज्छ र त्यो मधेसी अनुहारको जुन लहर चल्यो, त्यसले अरू मधेसी नेताका कामहरू, मधेसी नेताको अनुहार, अरू मधेसी पार्टीका कामसम्मलाई मान्छेहरूले भावनामा बगेर छोडिदिए, याद गरेनन् ।

तर अहिले गाह्रो पर्दा मधेसी दललाई सम्झिन थालेका छन् । त्यसैले त्यो एउटा जुन परिस्थिति आयो, हामीले विगतमा पनि भोग्दै आएका छौँ । तर यसपालि त्यसले गहिरो असर गर्‍यो । मधेसी उम्मेदवारलाई प्रधानमन्त्री बनाएर मधेसीलाई इमोसनल ब्ल्याकमेल गर्ने काम भयो । अब मधेसी प्रधानमन्त्री भयो भने समग्र मधेसीलाई त्यसले उपलब्धिमूलक हुन्छ । अथवा अरू केही नभए पनि मधेसी एउटा प्रधानमन्त्री भयो भन्ने एउटा इतिहास बन्छ । अरू कुरा के हुन्छ, के हुँदैन, त्यो भविष्यमा हेर्न बाँकी छ । यही कुरा बुझेर नै मधेसी जनताले रास्वपालाई मत हालेका हुन् ।

त्यही त, मैले अघि पनि भनेँ नि, यो त नेतृत्वले गर्नुपर्ने कुरा हो । हामीले त पार्टीका बैठकहरूमा आवाज उठाउने हो । हामीले आवाज उठाएको पनि हो । एक त ६ महिना, ५ महिनामा नेतृत्व र संगठनलाई व्यापक परिवर्तन गर्न सकिँदैन ।

एउटा संगठनलाई परिवर्तनअनुरूप बदल्न त्यो समय पर्याप्त थिएन । त्यो जेनजी आन्दोलनपछिको जुन समय थियो, त्यो साह्रै छोटो थियो । नेतृत्व र संगठन परिवर्तन गर्नलाई त तलदेखि माथिसम्म सबै परिवर्तन गर्नुपर्छ, तर कम्तीमा हामीले केही नयाँ अनुहार, जसलाई समाजले विश्वास गर्न सक्थ्यो, मधेसको केही नयाँ अनुहारलाई हामीले अगाडि सार्नुपथ्र्यो । त्यसमा हामी चुक्यौँ, विभिन्न कारणले चुक्यौँ । भर्खरै एकता पनि गरेका थियौँ ।