Karnali Province government's internal income shows improvement, reaching over 48 crore in 9 months of the current fiscal year, with expe…

सुर्खेत । बजेट कार्यान्वयनमा कमजोर देखिएको कर्णाली प्रदेश सरकारले आफ्नो आन्तरिक आम्दानीमा भने सुधार ल्याएको छ । चालु आर्थिक वर्ष (२०८२/०८३) को ९ महिनामा प्रदेश सरकारले ४८ करोड ३ लाख ९५ हजार ८६२.५८ रुपैयाँ आन्तरिक आम्दानी गरेको हो ।

गत आर्थिक वर्ष (२०८१/०८२) को यही अवधिमा प्रदेश सरकारले ४१ करोडको हाराहारीमा आम्दानी गरेको थियो । यो पटक झन्डै ७ करोडले आम्दानी वृद्धि भएको प्रदेश लेखा नियन्त्रकको कार्यालयका लेखा अधिकृत ललित थापाले जानकारी दिए ।

चालु आर्थिक वर्ष ९६ करोड ७४ लाख ११ हजार आन्तरिक आम्दानी गर्ने प्रदेश सरकारको लक्ष्य छ । सोही लक्ष्यलाई आधार बनाएर चालु आर्थिक वर्षमा झन्डै ३३ अर्बको बजेट ल्याइएको थियो ।

असार मसान्तसम्म बजेटमा राखिएको लक्ष्य भेट्टाउन नसके पनि विगतका वर्षको तुलनामा यो वर्ष धेरै आम्दानी हुने आर्थिक मामिला तथा योजना मन्त्रालयका वरिष्ठ राजस्व अधिकृत गणेशबहादुर चन्द बताउँछन् । सबै तथ्य तथ्याङ्क हेर्दा गत वर्षको भन्दा ८–१० करोड बढी आन्तरिक आम्दानी बढ्ने उनले बताए ।

‘हामीले रोयल्टी लगाएर ९६ करोड लक्ष्य राखेका हौँ,’ उनले रातोपाटीसँग भने, ‘८० करोड त नपुग्ला, तर ७४–७५ करोडसम्म पुग्छ कि भन्ने हाम्रो अनुमान छ ।’

गत वर्ष ८३ करोड ४४ लाख ६५ हजार वार्षिक आन्तरिक आम्दानीको लक्ष्य राखिएकोमा जम्मा ६५ करोड ९४ लाख आम्दानी गरेको थियो ।

यसअघि प्रदेश सरकारले सबैभन्दा धेरै आम्दानी आर्थिक वर्ष २०८०/०८१ मा गरेको छ । उक्त वर्ष ८३ करोड ६२ लाख लक्ष्य राखिएकोमा ७२ करोड ५३ लाख ७४ हजार बराबर आम्दानी गरेको थियो ।

हेर्नुहोस् विगतमा कर्णाली प्रदेश सरकारले आन्तरिक आम्दानीको लक्ष्य र प्रगतिः

नोटः जम्मा आम्दानीमा चालु आर्थिक वर्षको चैत मसान्तसम्मको आम्दानी जोडिएको छैन ।