चक्रपथ विस्तार : चिनियाँ सहयोगमा हुन लागेको सडक स्तरोन्नतिमा विगतको जस्तो कमजोरी हुन नदिन के गरिँदै छ
नेपाल र चीनबीच काठमाण्डू उपत्यकामा चक्रपथ विस्तारको दोस्रो चरण थाल्ने सम्झौता भएपछि नेपाली अधिकारीहरूले उक्त महत्त्वपूर्ण सडक विस्तार कार्य अघि बढाउँदा विगतका त्रुटिहरू दोहोरिन नदिने गरी गृहकार्य गरिएको बताएका छन्।
भौतिक पूर्वाधार तथा यातायात तथा सहरी विकासमन्त्री सुनील लम्साल र नेपालका लागि चिनियाँ राजदूत झाङ माओमिङले चक्रपथ दोस्रो चरणमा विस्तार गर्ने योजना कार्यान्वयन गर्न बुधवार सम्झौता भएको थियो।
चिनियाँ सरकारले उपलब्ध गराउने १२ अर्ब रुपैयाँभन्दा बढी अनुदानबाट उक्त सम्झौताअनुसार काठमाण्डूको कलङ्कीदेखि वसुन्धारासम्मको ८.२ किलोमिटर सडकखण्ड विस्तार गर्ने योजना छ।
विगतमा पहिलो चरणको परियोजनाअन्तर्गत चिनियाँ सहयोगमा कलङ्कीदेखि कोटेश्वरसम्म काम सुस्त गतिमा अघि बढेको विषयदेखि सडक र अन्य पूर्वाधारबारे पनि प्रश्नहरू उठेका थिए।
यसपालि विगतमा उठेका प्रश्नहरूलाई सम्बोधन गर्ने हिसाबले काम अघि बढाइने अधिकारीहरूले बताएका छन्।
भौतिक पूर्वाधार तथा यातायात मन्त्रालयका प्रवक्ता रामहरि पोखरेलले चक्रपथ विस्तारका बारेमा नेपाल र चीनले पहिले नै समझदारी गरेको र अहिले त्यसलाई कार्यान्वयन गर्न दुई पक्षबीच सम्झौता भएको बताए।
