आङ सान सूची: प्रजातन्त्रवादी नेत्रीलाई घरमा नजरबन्दमा राखिएको र सजाय घटाइएको सेनाको दाबी
म्यान्मारको सैनिक सरकारले थुनामा रहेकी प्रजातन्त्रवादी नेत्री आङ सान सू चीलाई घरमा नजरबन्दमा सारिएको र उनको सजायलाई घटाएर १८ वर्ष बनाइएको जनाएको छ।
सरकारी सञ्चारमाध्यमले नोबेल शान्ति पुरस्कार विजेता सू ची दुई जना सैनिक पोसाक लगाएका व्यक्तिका सामुन्ने बसिरहेको एउटा तस्बिर पनि प्रसारण गरेका छन्।
उनका छोरा किम एरिसले बीबीसीलाई उक्त तस्बिरको कुनै अर्थ नभएको बताए। उनका अनुसार त्यो चार वर्ष पुरानो तस्बिर हो र आफ्नी आमा जीवित छन् कि छैनन् भन्नेबारे आश्वस्त हुने गरी जानकारी नपाएको उनले बताए।
उनले प्रेस विज्ञप्तिबाट पछिल्लो जानकारी आएको भए पनि म्यान्मारको सैन्य सरकारलाई विश्वास गर्न नसकिने बताए।
सन् २०२१ मा सू चीको सरकारलाई सैन्य कूबाट अपदस्थ गरिएको थियो। उनलाई लगाइएका आरोपहरू आधारहीन रहेको धेरैले बताउने गरेका छन्।
थुनामा रहेकी ८० वर्षकी नेत्री सू चीलाई घरमा नजरबन्दमा सारिएको म्यानमारको सरकारी सञ्चारमाध्यमले जानकारी दिएको हो।
सन् २०२१ मा सैन्य कूमार्फत् अपदस्थ गरिएकी सू चीलाई त्यसयता राजधानी न्यापीडअस्थित सेनाको एउटा जेलमा थुनामा राखिएको ठानिएको थियो।
